Repostería popular da zona

Chulos

• Tres ovos.
• Sal.
• Dúas cuncas de leite.
• Fariña de trigo (a que admita).
• Lévedo.

Mesturar os ingredientes ata que quede unha masa solta e deixar repousar unha media hora.

Cunha culler coller doses e ir fritíndoas en abundante aceite.

Servir quentes e acompañados (opcionalmente) de azucre ou mel.

Faragullos

• Tres ovos.
• Sal.
• Dúas cuncas de leite.
• Un chorro de auga.
• Fariña de trigo (a que admita).

Bater o ovo, engadirlle o sal, o chorro de auga e o leite.

Ir engadindo fariña ata que quede unha masa homoxénea, con algo de corpo.

Deixar repousar.

Nunha tixola quentar un pouco de aceite e engadir unha cullerada grande de masa.

Cando empece a callar dar a volta e esmiuzar a masa cunha culler de madeira, como se se tratase dun revolto.

Desta receita hai outras variantes e poden servirse con azucre ou con mel, facelas con torresmos pequenos, ou ben servirse para comer con leite.

Filloas

• Tres ovos.
• Sal.
• Dúas cuncas de leite.
• Un chorro de auga.
• Fariña de trigo (a que admita).

Bater os ingredientes ata obter unha masa lixeira e deixala repousar.

Nunha tixola ou nunha prancha ir engadindo un chorro de masa, estirándoa para que queden ben finas as filloas.

Cando estean douradas por un lado, dar a volta, dourar e ir colocándoas nunha fonte para servir.

Orellas de Carnaval

• Dous ovos.
• Dúas cuncas pequenas de auga morna.
• Reladura de limón.
• Sal.
• Aceite ou manteiga.
• Lévedo.
• Un chorro de anís.

Bater ben os ovos e engadir a auga morna, á que previamente se lle engadiu o anís, o sal e a reladura de limón.

Ir engadindo fariña, a que admita, ata que quede unha masa compacta, que teremos que traballar cun rolo.

Tapar a masa cun pano e deixar repousar dúas horas.

Posteriormente ir collendo porcións pequenas e ir estirando co rolo, o máis fina posible, sobre unha base untada anteriormente con aceite ou manteiga.

Nunha tixola quentar aceite abundante e ir fritindo as orellas ben estiradas, procurando no momento de botalas facerlle a forma de orella cun garfo.

Retirar e servir nunha fonte esparexéndolles azucre glas.